Mədəniyyət və Turizm Nazirliyinə yeni səlahiyyət verilib

Təbii-landşaft obyektlərinin mühafizə zonaları Mədəniyyət və Turizm Nazirliyi tərəfindən müəyyən ediləcək

Bakı, Nazilə Xaqani, İnteraz - 12 Oktyabr 2017, 12:58

Azərbaycanda tarixi, arxeoloji, şəhərsalma, arxitektura və monumental sənət abidələrinin, təbii-landşaft obyektlərinin mühafizə zonaları Mədəniyyət və Turizm Nazirliyi tərəfindən müəyyən ediləcək.

İnterAz-ın məlumatına görə, bununla bağlı Nazirlər Kabineti “Mədəni sərvətlərə mühafizə dərəcəsinin tətbiqi Qaydası”nda dəyişiklik edib.

Sənədin indiyədək mövcud olan variantına görə, tarixi, arxeoloji, şəhərsalma, arxitektura və monumental sənət abidələrinin, təbii-landşaft obyektlərinin mühafizəsini təmin etmək məqsədi ilə Azərbaycan Respublikasının Nazirlər Kabineti tərəfindən həmin obyektlərin mühafizə zonaları müəyyən edilirdi.

Yeni dəyişikliklərə əsasən isə tarixi, arxeoloji, şəhərsalma, arxitektura və monumental sənət abidələrinin, təbii-landşaft obyektlərinin “(“İçərişəhər” Dövlət Tarix-Memarlıq və “Qala” Dövlət Tarix-Etnoqrafiya qoruqlarının əraziləri istisna olmaqla)” mühafizəsini təmin etmək məqsədi ilə Mədəniyyət və Turizm Nazirliyi, “İçərişəhər” Dövlət Tarix-Memarlıq və “Qala” Dövlət Tarix-Etnoqrafiya qoruqları ərazilərində isə “İçərişəhər” Dövlət Tarix-Memarlıq Qoruğu İdarəsi” tərəfindən həmin obyektlərin mühafizə zonaları müəyyən ediləcək.