Hacı Şahin: Bu gün də dünya Peyğəmbər (s) nümunəsinə ehtiyaclıdır

Müsəlman dünyası Allahın sonuncu elçisi həzrət Məhəmmədin (s) mövlud günlərini qeyd edir...

Bakı, Gülnarə Quliyeva, , İnteraz - 14 Noyabr 2019, 09:53

 "Müsəlman dünyası Allahın sonuncu elçisi həzrət Məhəmmədin (s) mövlud günlərini qeyd edir. Peyğəmbərimizin (s) göz açdığı dünya ziddiyyətli idi. Həmin dövrü "qaranlıq əsrlər" yaxud "cahiliyyət" adlandırmağımız onunla bağlıdır ki, həmin dövrü bugünümüzlə müqayisə edirik. Lakin elə həmin dövrdə yaşasaydıq, qarşımızda ehtişamlı şəhərləri, qüdrətli orduları, işlək idarəçilik sistemləri ilə dünyaya meydan oxuyan böyük sivilizasiyaları, imperiyaları görərdik. Amma bütün bu cah-cəlal və qüdrət arxasında gizlənmiş insan faciəsi Peyğəmbərimizin (s) zühuru ilə üzə çıxdı".

 

İnterAz xəbər verir ki, bu fikirləri "Məşədi Dadaş" məsdinin axundu, ilahiyyatçı hacı Şahin Həsənli deyib.

 

İlhaiyyatçı bildirib ki, unudulmuş səhralıqdan çıxan bir peyğəmbər insanlığın düşdüyü mənəvi böhrandan çıxış yolu göstərdi. Sükuta qərq olmuş tarix canlandı.

 

Bu gün də insanlıq faciəsi təm-təraqlı görüntü arxasında gizlənib. Bu gün də dünya Peyğəmbər (s) nümunəsinə ehtiyaclıdır. Peyğəmbərimizin (s) ilk addımı Mədinədə müxtəlif din və millət mənsublarını bir araya gətirməsi oldu. "Hansı qibləyə üz çevirməyinizdən asılı olmayaraq, xeyir işdə bir birinizlə yarışın", "hansı əqidəyə mənsub olsanız da, insani fitrətinizə söykənin", "nə qədər fikir ayrılığınız olsa da, ümumi dəyərlər axtarın" prinsipləri hakim idi onun rəhbərlik etdiyi cəmiyyətdə. Bütün bunlarla, əslində islam ümmətinin inkişaf strategiyasını təyin etdi peyğəmbərimiz(s). Həzrət Məhəmməd(s) bəşəriyyətə qənim kəsilən zülmə məhz bu yolla meydan oxudu. Günümüzdə də, bu prinsipləri ilk olaraq müsəlmanlar öz aralarında bərqərar etməli və dünyaya nümunə olmalıdırlar.

 

"Aləmlərə rəhmət olaraq göndərilən bir peyğəmbərin mövlud günləridir. Hamınızı təbrik edir, Peyğəmbərimiz (s) kimi mərhəmət mənbəyi olmağı, dünyaya işıq saçmağı arzu edirəm", deyə Ş.Həsənli vurğulayıb.