Millimiz 10 min dollar mükafat fondu olan yarışa qatılacaq

Qalibə 5 min, gümüş medalçıya 2 min və bürünc medalçılara, eləcə də qızıl medal qazananın məşqçisinə min dollar pul veriləcək

Bakı, Gülnarә Quliyeva, İnteraz - 06 Dekabr 2018, 08:42

Dekabrın 8-9-da Şimali Osetiyanın paytaxtı Vladiqafqazda sərbəst güləş üzrə “Alans” (“Alanlar”) adlı II beynəlxalq turnir keçiriləcək.

 

İnterAz xəbər verir ki, bu yarışda 15 ölkənin – Rusiya, Qazaxıstan, Özbəkistan, Belarus, Azərbaycan, Moldova, Ermənistan, Gürcüstan, ABŞ, İran, Polşa, Monqolustan, Hindistan, Slovakiya və İspaniyanın güləşçiləri mübarizə aparacaq.

 

İştirakçılar arasında Olimpiya çempionlarının iştirakı gözlənilir. Hər çəki dərəcəsi üzrə mükafat fondu 10 min dollar təşkil edir. Qalibə 5 min, gümüş medalçıya 2 min və bürünc medalçılara, eləcə də qızıl medal qazananın məşqçisinə min dollar pul veriləcək.

 

Əldə etdiyimiz məlumata görə, millimiz orada üç idmançı ilə təmsil olunacaq. Bunlardan biri 92 kiloqram çəki dərəcəsində güləşəcək Olimpiya çempionumuz Şərif Şərifovdur. Digər iki güləşçi isə Dağıstandan olan legionerlərimizdir.

 

Qeyd edək ki, “Alanlar” turniri ilk dəfə ötən ilin noyabrında keçirilib. 12 ölkənin güləşçiləri arasında Şərif Şərifov, İtaliyanı təmsil edən əslən Kubadan olan ikiqat dünya çempionu Frank Çamiso və Rusiya güləşinin çox sayda ulduzu olub.

 

Xatırladaq ki, Şərif Şərifov (-97 kq) ötən il bu turnirin finalında osetin Vladislav Baytsayevə uduzub.