Bill Qeyts koronavirus infeksiyasını dayandırmağın yolunu açıqlayıb

....İnvestisiyalara ehtiyacımız var

Bakı, Gülnarә Quliyeva, İnteraz - 20 Fevral 2021, 09:54

“Microsoft”un yaradıcısı Bill Qeyts koronavirus peyvəndlərinin istehsalı üçün müəssisələrin inşasına milyardlarla dollar vəsait ayrılmalı olduğunu bildirib.

 

İnterAz xəbər verir ki, o bu barədə Münhen Təhlükəsizlik Konfransında "pandemiyadan necə qurtulmaq olar?" barəsində çıxış edərkən bildirib. Qeytsin çıxışı konfransın rəsmi yutub kanalında yayımlanıb.

 

"İnvestisiyalara ehtiyacımız var. Bunun bir daha baş verməyəcəyindən əmin olmaq üçün bir neçə milyard dollara...",-deyə o qeyd edib.

 

Qeyts həmçinin dövlətlər və şirkətlər arasında iş birliyinin zəruriliyini də vurğulayıb. Onun fikrincə, indi və yaxın illərdə dünyanın əsas prioritet məsələləri dərmanlara bərabər çatımlılıq, eyni zamanda gələcəkdə oxşar fəlakətlərin qarşısını almaq üçün mütəxəssis səviyyəsində əməkdaşlıq olmalıdır.